Dhimbja e shpinës ose qafës kërkon kontekst, jo vetëm një imazh.

Dhimbje në pjesën e poshtme të shpinës që nuk lidhet me një shkak të vetëm strukturor ose me një sëmundje serioze të identifikueshme. Është forma më e zakonshme e dhimbjes së mesit dhe mund të ndikohet nga ngarkesa, lëvizja, gjumi, stresi dhe kapaciteti fizik.

• Dhimbje e lokalizuar në mes, me ose pa përhapje në vithe ose kofshë
• Ngurtësi dhe kufizim gjatë përkuljes, ngritjes ose qëndrimit të zgjatur
• Simptoma që ndryshojnë sipas pozicionit dhe aktivitetit

Një pjesë e diskut ndërvertebral del përtej kufijve të tij dhe mund të irritojë ose kompresojë një rrënjë nervore. Protruzionet dhe herniet mund të shihen edhe te persona pa dhimbje; rëndësia e tyre vlerësohet vetëm kur përputhen me simptomat dhe ekzaminimin.

• Dhimbje që përhapet nga mesi ose vithet drejt njërës këmbë
• Mpirje, shpime ose ndjesi djegieje në një shpërndarje nervore
• Dobësi muskulare ose ndryshim i reflekseve në raste të caktuara
• Dhimbje që mund të shtohet me kollë, teshtimë ose pozicione të caktuara

Ngushtim i kanalit spinal ose i hapësirave ku kalojnë nervat, zakonisht i lidhur me ndryshime degjenerative. Jo çdo stenozë e dukshme në imazheri shkakton simptoma.

• Dhimbje, rëndesë, mpirje ose dobësi në njërën ose të dyja këmbët gjatë ecjes ose qëndrimit në këmbë
• Simptoma që shpesh lehtësohen gjatë uljes ose përkuljes përpara
• Ulje e distancës së ecjes dhe nevojë për pushime të shpeshta

Spondiloliza është një defekt ose frakturë stresi në një pjesë të vertebrës; spondilolisteza është rrëshqitja e një vertebre ndaj tjetrës. Mund të jenë pa simptoma ose të shoqërohen me dhimbje dhe, më rrallë, me irritim nervor.

• Dhimbje mesi që mund të shtohet me qëndrimin, ecjen ose ekstenzionin
• Ngurtësi dhe tendosje e muskujve të pasëm të kofshës
• Dhimbje në vithe ose kofshë
• Mpirje, shpime ose dhimbje drejt këmbës kur përfshihet rrënja nervore

Thyerje e trupit vertebral, më shpesh pas traume ose te persona me dobësim të kockës, si osteoporoza. Kërkon vlerësim mjekësor dhe nuk trajtohet si një episod rutinë i dhimbjes së mesit.

• Dhimbje e papritur dhe e fortë në shpinë, shpesh pas rënies ose një ngarkese të vogël
• Dhimbje që shtohet në këmbë ose gjatë lëvizjes
• Ndjeshmëri e lokalizuar mbi vertebrën
• Humbje progresive e gjatësisë ose rritje e kifozës në fraktura të shumëfishta

Dhimbje e qafës pa një patologji të vetme specifike ose shkak serioz të identifikueshëm. Shpesh lidhet me kombinimin e ngarkesës, pozicioneve të zgjatura, lëvizjes dhe tolerancës së indeve.

• Dhimbje dhe ngurtësi në qafë ose shpatulla
• Kufizim gjatë kthimit ose përkuljes së kokës
• Dhimbje që mund të përhapet në pjesën e sipërme të shpinës ose shpatull
• Dhimbje koke e lidhur me lëvizjen ose pozicionin e qafës te disa persona

Ndryshime të lidhura me moshën në disqet, vertebrat dhe artikulacionet e qafës. Janë të zakonshme edhe pa simptoma; diagnoza klinike kërkon përputhje me ankesat dhe ekzaminimin.

• Dhimbje ose ngurtësi e qafës dhe shpatullave që mund të vijë e të largohet
• Kufizim i lëvizjes së qafës
• Dhimbje koke që shpesh nis nga pjesa e pasme e qafës
• Kërcitje gjatë lëvizjes, e cila vetëm nuk tregon domosdoshmërisht dëmtim

Materiali diskal ose ndryshimet degjenerative mund të irritojnë një rrënjë nervore në qafë. Simptomat zakonisht ndjekin krahun dhe dorën sipas nervit të përfshirë.

• Dhimbje që përhapet nga qafa drejt shpatullës, krahut ose dorës
• Mpirje ose shpime në krah, dorë ose gishta
• Dobësi në muskuj të caktuar të krahut ose dorës
• Simptoma që mund të ndryshojnë me pozicionin ose lëvizjen e qafës

Dëmtim i qafës nga një lëvizje e shpejtë përshpejtimi–ngadalësimi, më shpesh gjatë një aksidenti automobilistik. Mund të përfshijë dhimbje, kufizim të lëvizjes dhe simptoma të tjera pas traumës.

• Dhimbje dhe ngurtësi e qafës që mund të shfaqen menjëherë ose pas disa orësh
• Dhimbje koke, zakonisht nga baza e kafkës
• Dhimbje në shpatulla ose pjesën e sipërme të shpinës
• Marramendje, lodhje ose vështirësi përqendrimi te disa persona

Dhimbje koke e referuar nga strukturat e qafës. Diagnoza nuk vendoset vetëm nga vendndodhja e dhimbjes dhe kërkon diferencim nga migrena dhe lloje të tjera të dhimbjes së kokës.

• Dhimbje që nis në qafë ose në bazën e kafkës dhe përhapet drejt kokës
• Shpesh më e theksuar në njërën anë
• Kufizim i lëvizjes së qafës
• Përkeqësim me pozicione ose lëvizje të caktuara të qafës

Kompresion i palcës kurrizore në nivelin e qafës, zakonisht nga stenozë ose ndryshime degjenerative. Është gjendje neurologjike që kërkon vlerësim mjekësor të shpejtë.

• Ngathtësi e duarve, vështirësi me kopsa, shkrim ose kapje
• Çrregullim i ekuilibrit, ecje e pasigurt ose rëndesë e këmbëve
• Dobësi, mpirje ose shpime në krahë dhe/ose këmbë
• Ndryshime të kontrollit të urinimit ose defekimit në raste të avancuara

Sëmundje inflamatore reumatologjike që prek kryesisht artikulacionet sakroiliake dhe shtyllën kurrizore. Dyshimi klinik kërkon vlerësim mjekësor dhe, kur indikohet, reumatologjik.

• Dhimbje mesi që nis zakonisht para moshës 45 vjeç dhe zgjat mbi tre muaj
• Ngurtësi mëngjesore dhe dhimbje gjatë natës
• Përmirësim me lëvizje dhe jo me pushim të zgjatur
• Dhimbje që alternohet mes vitheve; mund të shoqërohet me inflamacion të syrit, psoriazë ose sëmundje inflamatore të zorrëve